Таремʼ хойʼ неʼʼ сыраʼ мэта паныдоʼ тырабтамбиʼʼ. Сёретиедоʼ хуравандоʼ нерняʼ нюртеʼʼэ ханотоʼ терʼʼ тырабтасетыʼʼ. Хусувэй ӈамгэдоʼ харта ханда мюняʼ ӈэсетыʼʼ. Мэта паныʼʼ лаха сёребтяʼʼ терʼʼ. Мядʼ еяʼʼ ӈани харто яхакуна хурасётыʼʼ. Сыраʼ мэта подеркартʼʼ тырабтаʼʼмахад сюрпидоʼ.

Таремʼ нибʼʼнандоʼ тырабтаʼʼ ябтёйӈэ тимдаʼʼ, ӈанидоʼ пурумдаʼʼ. Тимы паныʼʼ сывʼ ёльцянд ниʼʼ тэваӈгуʼʼ. Тадӈо саць ябтейʼʼ ӈэбта тухуʼʼ пыяʼ памя. Сарʼʼнюдаʼʼ ханʼ мюʼ хаʼʼавраванзь ханяримна сидамда хоӈгу. Пыйʼʼ сёребтя мюняʼ ӈадивоʼʼмахад ӈамгэрт ниʼʼ хаеӈгуʼʼ. Тарця маянд нивандоʼ еремандоʼ еʼʼэмня, неʼʼ сыраʼ мэта ханодоʼ, паныдоʼ тырабтамба варемдоʼ мэӈаʼʼ.

Тюку сидяӈгана сарёʼ пуд мядодоʼ, ханотоʼ терʼʼ тёмби”. Мятоʼ еяʼʼ панʼ тюʼʼу парталавыʼʼ. Ваʼʼаватоʼ терʼʼ пэдараʼ пяʼ ниʼ ляӈгабтаʼʼвыʼʼ. Мэядавыʼʼ хобаʼʼ, паныʼʼ терсяда ханʼ ниняʼ ӈаʼʼ. Сыранда хаʼʼамʼʼмахад ханотоʼ мюд хасуйʼʼ паныдоʼ тэри нэкалтыдоʼ.