Ринат Маллямов

БӘРАӘТ КИЧӘСЕН ҮТКӘРҮ ӨЧЕН КИҢӘШЛӘР

‼️ БУ КИҢӘШләр – фарыз гамәлләр түгел‼️

АК КӨННӘР УРАЗАСЫ һәр айның 13-15 нче көннәрендә тотыла. Бу айда 1-3 нче февраль көннәренә туры килә. БӘРАӘТ кичәсе – шәгьбан аеның 15 кичәсе – быел: 2-3 нче февральдә булачак. Күп мөселманнар 1 нче февральдән башлап, уразага керде. Раббыбыз кабул уразалар тотарга насыйп итсен! БӘРАӘТ КИЧӘСЕ сишәмбе көнне – 2 нче февральдә, ахшамнан соң башлана. Бу изге кичә – һәр тәкъва бәндә өчен гөнаһлардан азат булу, бәхеткә һәм иминлеккә ирешү кичәсе булып тора. Аллаһү Тәгалә нәкъ менә шул көнне һәр адәмнең язмышын, бер еллык бәхет, сәгадәтләрен билгеләнеп куя. Бу кичәдә барлык тормышыңны күз алдыннан үткәрү киңәш ителә. Беркем дә үзенең Раббысы Аллаһы Тәгалә каршына кайтачагын исеннән чыгарырга тиеш түгел. Кем бу кичәне бушка үткәрә – ул зур өстенлекләрдән мәхрүм кала. Ошбу кичәдә, көндезен ураза тотып, кичен гыйбадәттә үткәрү – бик саваплы гамәл. Чөнки Шәгъбан ае нәфел уразаларны күпләп тота торган ай. БӘРАӘТ КИЧӘСЕ – мәрхүмнәрнең гөнаһларын ярлыкауны сорап догалар кылу, мохтаҗларга сәдака тарату һәм дә мөэмин-мөселманнар бер-берсе белән кунакка йөрешү өчен яхшы көн. Бу кичәне гыйбадәт кылып, Коръән- Кәримне укып, намазлар кылып, зикерләр әйтеп уздыру бик күркәм гамәлләр. Бу көнне кояш баер алдыннан, Аллаһы Сүбехәәнә үә Тәгаләгә хәмде-санәләр, зикерләр һәм Расүлебез ﷺ-гә салаватлар күпләп әйтелә. Мәсәлән: СҮБеХӘӘНӘЛЛААҺИ ҮӘЛ ХӘМДҮ ЛИЛЛӘӘҺИ ҮӘ ЛӘӘ ИЛӘӘҺӘ ИЛЛӘЛЛААҺҮ ҮӘЛЛААҺҮ ӘКБӘРь. ҮӘ ЛӘӘ ХӘҮЛӘ ҮӘ ЛӘӘ КУВҮӘТӘ ИЛЛӘӘ БИЛЛӘӘҺИЛ ГӘЛИЙЙИЛ ГӘЗЫЙИМ. ӘЛЛААҺҮММӘ САЛЛИ ГӘЛӘӘ СӘЙЙИДИНӘӘ МҮХӘММӘДИН- НӘБИЙЙИЛ ҮММИЙЙИ ҮӘ ГӘЛӘӘ ӘЛИҺИ ҮӘ САХБИҺИ ҮӘ СӘЛЛИИМ. БӘРАӘТ кичәсендә 4 рәкәгать ТӘСБИХ намазы уку күркәм эш. Нияте: Йәә Раббым, ният иттем Тәсбих намазын укырга, күңел төшенкелегеннән үә дөнья басуыннан котылу һәм үзем, Иләһи гафуыңа ирешеп, бәхетлеләр дәфтәренә язылуым өчен… Аннан соң, изге теләкләр һәм максатларны өмет итеп, мәрхүм һәм мәрхүмәләр рухына багышлап, 3 тапкыр “ЙӘСИИН” сүрәсен уку да саваплы гамәл БӘРАӘТ кичәсендә 3 тапкыр “ЙӘСИН” сүрәсе уку тәртибе. Беренче нияте: "Йәә Раббым, ният кылдым дөньяда да ахирәттә дә бәхетле булу өчен "ЙӘСИИН" сүрәсен укымакка, Раббым, кабул ит!” соңыннан БӘРАӘТ догасы кылына. Икенче нияте: "Йәә Раббым, бу дөньяда озын, гыйбәдәтле гомер насыйп булсын өчен "ЙӘСИИН" сүрәсен укырга ният кылдым, Раббым, кабул ит!” Артыннан, шулай ук, БӘРАӘТ догасы укыла. Өченче нияте: "Раббым, мине, гаиләмне һәм якыннарымны бөтен начарлыклардан саклавың һәм ризыкларыбызның мул булуы өчен "ЙӘСИИН" сүрәсе укымакка ният кылдым, Үзең кабуллардан кыл!” "ЙӘСИИН"нән соң, кабат БӘРАӘТ догасы укыла. БӘРАӘТ КИЧӘСЕ ДОГАСЫ: اَللَّهُمَّ اِنْ كُنْتَ كَتَبْتَ اِسْمِي شَقِيًّا فِي دِوَانِ الْاَشْقِيَاءِ فَامْحُهُ وَ اكْتُبْ فِي دِوَانِ السُّعَدَاءِ وَ انْ كُنْتَ كَتَبْتَ اِسْمِي سَعِيدًا فِي دِوَانِ السُّعَدَاءِ فَاثْبُتْهُ فَاِنَّكَ قُلْتَ فِي كِتَابِكَ الْكَرِيمِ يَمْحُ اللَّهُ مَا يَشَاءُ وَ يُثْبِتُ وَ عِنْدَهُ اُمُّ الْكِتَابِ. ӘЛЛААҺҮММӘ ИҢ КҮНТӘ КӘТӘӘБеТӘ ИСМИИ ШӘКЫЙЙӘӘ ФИИ ДИҮӘӘНИЛ- ӘШКЫЙӘӘ-И ФӘМХҮҺҮ ҮӘК-ТҮБе ФИИ ДИҮӘӘНИС- СҮГӘДӘӘ’И. ҮӘ ИН КҮНТӘ КӘТӘӘБеТӘС-МИИ СӘГИИДӘН ФИИ ДИҮӘӘНИС- СҮГӘДӘӘ’И. ФӘҪБҮТҺҮ ФӘИННӘКӘ КУЛьТӘ ФИИ КИТӘӘБИКӘЛ-КӘРИИМ. ЙӘМХҮЛЛААҺҮ МӘӘ ЙӘШӘӘ’Ү ҮӘ ЙҮҪБИТҮ ҮӘ ГИНДӘҺҮ ҮММҮЛ-КИТӘӘБИ. – / Әй Аллаһым, әгәр мине бәхетсез итеп, исемемне бәхетсезләр дәфтәренә язган булсаң, аны сөртеп юк ит һәм бәхетлеләр дәфтәренә яз. Әгәр мине бәхетлеләрдән итеп, исемемне бәхетлеләр дәфтәренә язган булсаң, әлеге язуны беркайчан да сөртелми торган ит. Чынлыкта, Син Корьән- Кәримеңдә: “Аллаһы Тәгалә нәрсәне теләсә, Ләүһүл- Мәхфүздән шуны сөртер, юк итәр, теләгәнен исә калдырыр, сөртелмәслек итәр”, – дип әйтәсең. Бу көннәрдә күңел кояшыбыз якыннарыбызны нурландырып, сөендерсен! Көннәребез дә кояшлы, нурлы, имин булып, хәерле, өметле, өлешле, уңышлы, хасиятле, хәрәкәтле узсын. Үзебез иман юлында булып, игелекле, изге, хәләл гамәлләр, гыйбәдәтләр кылыйк. Һәркемне куанычлы хәбәрләр шатландырсын. Сугышлар тукталсын! Илебездә тынычлык урнашсын. Газиз кешеләребез яу кырларыннан исән-имин, сау-сәламәт тән белән кайтып, үзебезне куандырсын. Аллаһы Тәгаләбез барыбызны да ярдәменнан, исәнлектән, саулыктан аермасын! Йөргән җирләребездә фәрештәләр канатларын җәеп торсын! Күңелдә һәрчак тынычлык яшәсен. Йөрәктә – олы хисләр. Дөньяларда – иминлек. Өйләрдә – шатлык, җылылык. Уйларда – якты хыяллар. Үткәндә – матур хатирәләр! Ә киләчәктә – иң яхшылар гына булсын! Бүгенге көнегез бары тик бәхетле мизгелләрдән генә торсын! Һәрберегезгә дә ныклы исәнлек телим!