Татьяна Степанова

19 январь - Вӱд модмо кече!

Чӱчкыдын, вӱд модмо кече вашеш марий калык коклаште, тыгай йодыш йоҥга: «Кунам вӱдым налаш кӱлеш, йӱдым але волгыдо жапыште?» Мари калык коклаште ожсо йӱла почеш тыгак маныт, лач вӱд модмо кечыште йӱд пычкемыште вӱдым налман огыл, а эр эрдене Кече Авалан пелештен вара вӱдым налашлан памаш але таве деке миен, кӧн памаш уке гын, эҥер гычат вӱдым налаш лиеш. Вӱд Авалан пелештен вара кум гана подылаш да шӱргым шӱялташ кӱлеш. Тидым шуктымеке вара иже янда атыш вӱдым темаш кӱлеш. Тылзылан тура шындыман, Ош Поро Кугу Юмо шке вий-куатшым саде вӱдлан пуа. Тиде вӱдым подылмеке, капкылымат мушман, пӧрткӧргымат эрыктыман, чыла осалым, нелылыкым, мушкын колтыман. Саде вӱд идалык мучко кугу вийым кучен шога. Ожно, марий калык Вӱд Авалан посна ял кумалтышымат эртарен. Чес пӧлек шотеш колым, шем агытаным, шем лудым пуэныт. Но тыгай кумалтыш мондалташ тӱҥалын. Ты татыште вӱдын вийже эн тале лиеш. Айдемынат кугу ужашыже лач вӱд гыч шога, санденак пӱртӱс вий дене кугу кылым куча. Мончаш пурымо годымат Вӱд Ава деч вий-куатым, кӱшыл уш-акылым, кужу ӱмырым, пеҥгыде тазалыкым, ешыште ваш-ваш умылымашым, йӧратымашым, порым, волгыдым, яндарым да ласкалыкым йодын пелештыман. Кече Авалан вӱд модмо кечын пелештыме мут. Поро Кече Ава, а теве таче йӱштӧ луман кече жапыште, вӱд модмо кече татыште, алал кумылет дене, пӱртӱсын кумда аҥаште, пыл аважын вӱд аважын, мланде аважын суапле пашажым виктарен шогет. Эр ӱжара дене йӱд пычкемышым сеҥет да тӱням ылыжтет. Волгыдо шинчаончалтышет дене кумылым нӧлтет. Осал койшымат, лавыра шомакымат, чон ойгыжымат, волгалт шогышо поро вий куатет дене эрыктен шогет. Мланде ӱмбалне илышым волгыдо сапет дене кучен шогет. Ош тӱняште тӱрлӧ калыкланат, кучымо вольыкланат, ир янлыкланат, кайыквусыланат, да чыла чонанланат илышаш вийым пуэн шогет. Ыштыме пашаште - ӱнарым пуэт. Каныме верыште - куандарет шогет. Тыланет таче поро Кече Ава, вуйым савен, тауштен кумалын шогем. Пелештыме мутем пӱртӱс лоҥгаште кумдан поро дене шарлен шогыжо. Алал лийже!!! Вӱд Авалан вӱд модмо кечыште пелештыме мут. Таче Вӱд модмо кечет, Вӱд Ава, Вӱд суксо йывыртыктен толын шого. Ший памаш дек толын шогалын, ший вӱдетым налын, ший вӱдет дене мушкылтын, таум ыштен пелештем. Ший вӱд гай вий-куатым поген шогаш, кап-кыл тазалыкым, кужу ӱмырым йодам. Сурт-печышкем наҥгаен, еш дене мушкылтын да йӱын, тазам, аралтышым йодам. Вольыклан йӱктем, таза, тӱле лийже. Вӱд Авалан, Вӱд суксылан алал лийже. Чыла осалым ойырыза, ончыкыжым сай илышым виктарен шогыза. Мыйын пелештымем алал лийже. #вӱдмодмокече #чимарийла #виталийголовин